المفلس اللي ما زبن بنت فراس ............. ولا حصل له من بنات الكحيلة
زبنتها والحال حالة ومحتاس .............. صارت علينا من الليالي سحيلة
زبنتها يا ربعنا وقت الادماس ............... واحس انا بالجوف مثل المليلة
قالت دخيل وقلت جيتك ومنداس ......... ضاعت حقوقي والبرايا بخيلة
قالت زبنت ومزبنك يجلي الباس ......... يالدهمشي دونك نسل الصقيلة
وعيالي اللي دونكم تشرب الكاس .............. هيلا عليهم عزوتي بالقبيلة
وابوهم اللي فعله زايد وله باس ............. لو كان حي يحقق المستحيلة
مثلك عمود البيت وعندي هو الساس ... حياك ربي ضيف البيت ودخيله
متمركية ما بين نجر ن ومحماس .......... ما جمعت عجز القبايل مخيلة
صبت لي من فنجالها يغدي الاعماس .... مبهر ن يغدي خوى الراس هيله
وعطتني اللي عينها عين قرناس .............مثل العنود اللي تقود الجميلة
ما نشدتني عن مهرها والالباس .................. عطية غبيني ما دور بديله
قالت لي خذها يا فتى واترك الناس ......... روح لاهلك ومسكتني شليله
لي الشرف في نسبهم وارفع الراس ...... اليقالوا حظه قام الملحم عديله
شيوخنا اللي للمناعير نبراس ............... جود وكرم هم محتمين الدبيلة
نعم ن بصيتة بنت العسود فراس ............ افعولهم تشهد عليها الفصيلة
كم واحد ن من فعلهم طاح منحاس ........ دمه يبخ وبالوطا سال سيله
شفت الشحم ببيوتهم مثل الاطعاس ......... صينية يالله الجماعة تشيله
وشفت الشجاعة كلها وقطع الانفاس .. شوفي بعيني ما هي هرجة هبيلة
ما هدهم ظرف الزمن مثل الالماس ........ مثل الذهب يلمع بزايد صقيله
يوم ان بعضهم ما كسب كل نوماس ........ عند الوزا ياكل حلايب عميله
لي الشرف في نسبهم وارفع الراس ........ الدهمشي جاب العريبة حليلة
والحمد لله جبتها ذربة الساس .......... من نسل حسين وبالصبايا طويلة
جابت اللي تطربه قب الافراس .............. خيالها وان ضاقت بيه دخيله
ابيه يدور ما مضى عند الانجاس ............. حق غدا لي عندهم والثميلة
اهل الردى واعلومهم كلها اخساس ......... ما دورا رضى الولي والفضيلة
ابيه يسوي بالعرب فعل جساس ............ يذبح الراس ولا يصيد الهزيلة

القارظ العنزي